Hallgrímur Gunnþórsson hefur verið ráðinn í afleysingu fyrir forstöðumann í búsetu frá og með 15 .ágúst n.k.

Hallgrímur er með BA gráðu í félagsráðgjöf ásamt MS gráðu í mannauðstjórnun og reynslu í vinnu með fötluðum.

Hann er kvæntur og á tvö börn, hann er Vestfirðingur bjó í Bolungarvík og á Ísafirði á sínum yngri árum.

Svest býður hann velkomin til starfa

Í samstarfi við Námsbraut í fötlunarfræðum við Háskóla Íslands



Námskeiðið er ætlað öllum sem hafa áhuga á að velta fyrir sér birtingarmyndum fötlunar í menningu og listum, og umfjöllun um fötlun í fjölmiðlum.

Birtingarmyndir fötlunar er mikilvæg heimild um viðhorf samfélaga til fatlaðs fólks. Innan fræðanna hefur lítil áhersla verið lögð á að skoða samspil fötlunar, menningar og lista ef frá eru taldar þær fræðigreinar er snúa að notkun listgreina í kennslu, þjálfun og endurhæfingu. Sú áhersla er oft í samræmi við hefðbundinn skilning á fötlun sem galla sem þarf að bregðast við að lækna og laga. Með tilkomu fötlunarfræða og nýjum skilningi á fötlun sem leggur áherslu á félagslega þætti hefur áhugi aukist á birtingarmyndum fötlunar í menningu, listum og fjölmiðlaumfjöllun um fatlað fólk.

Markmið námskeiðsins er að þátttakendur öðlist þekkingu og skilning á menningarbundnum hugmyndum um fötlun. Á námskeiðinu verður rýnt í stöðu og ímynd fatlaðs fólks og birtingarmyndir fötlunar í menningu vestrænna samfélaga. Fjallað verður um ímyndir og hlutverk fatlaðs fólks m.a. í listum, dægurmenningu, fjölmiðlum og bókmenntum. Umfjöllun námskeiðsins verður sett í samhengi við stöðu fatlaðs fólks í menningu samtímans.

Námskeiðið verður sent um fjarfundabúnað á Fræðslu- og símenntunarmiðstöðvar svo og á aðra staði sé þess óskað.

Kennarar:Hanna Björg Sigurjónsdóttir, lektor og Kristín Björnsdóttir, aðjúnkt í fötlunarfræðum við Háskóla Íslands

Tími: Mán. 12. apr. og fim. 15. apr. kl. 16 - 19, lau. 17. apr. kl. 9 - 12, mán. 26. apr.

og fim. 29. apr. kl. 16 - 19 (5x)

Verð: 29.900 kr.

Staður: Endurmenntun, Dunhaga 7

Athugið við skráningu!

Skipuleggjendur námskeiðsins leggja áherslu á að það sé aðgengilegt fyrir alla og lagað að þörfum þátttakenda. Því biðjum við þig um að taka fram, í athugasemdareit við rafræna skráningu eða við skráningu í síma, ef eitthvað af neðangreindu á við um þig:

Þarf táknmálstúlk

Þarf námsgögn á stækkuðu letri eða blindraletri

Þarf námsgögn á auðlesnum texta

Þarf rittúlk

Kem með aðstoðarmann

Nota hjólastól

... eða annað sem skiptir máli að skipuleggjendur viti af.

Undirritaðir þátttakendur á norrænni ráðstefnu um samning Sameinuðu þjóðanna um réttindi fatlaðs fólks í Stokkhólmi vilja koma á framfæri mikilvægi neðangreindra greina samningsins fyrir fólk með þroskahömlun.

Við skorum á stjórnvöld og opinberar stofnanir hvers lands að:

· Framfylgja ákvæði 8. greinar hans um vitundarvakningu þannig að fleiri þekki til og beri virðingu fyrir fólki með fötlun.

· Framfylgja ákvæði 12. greinar um réttarstöðu til jafns við aðra með því að tryggja að fólk með þroskahömlun fá viðeigandi stuðning við að nýta gerhæfi sitt.

· Framfylgi 19. grein samningsins um að lifa sjálfstæðu lífi og án aðgreiningar með því að tryggja fólki með þroskahömlun möguleika á að velja hvernig, hvar og með hverjum þeir búa til jafns við aðra.

· Framfylgi 24. grein um menntun með því að tryggja fólki með þroskahömlun fullan aðgang að síbreytilegri menntun á öllum skólastigum, þ.m.t fullorðinsfræðslu.

Við krefjumst þess að þið beitið ykkur fyrir því að samningur Sameinuðu þjóðanna um réttindi fatlaðs fólks komist að fullu í framkvæmd á öllum Norðurlöndunum.

Við minnum einnig á allar aðgerðir séu unnar í fullu samráði við fólk með þroskahömlun og hagsmunasamtök þeirra. ( Grein 4.3 ).

Minnt er á kjörorð fatlaðs fólks; Ekkert um okkur án okkar

Stokkhólmi, 20. mars 2010

Hagsmunasamtök fólks með þroskahömlun á Norðurlöndunum;

FUB og Klippan í Svíþjóð, Kehitysvammaisten Tukiliitto ry og Me ltse ry í Finnlandi, Lev og Ulf í Danmörku, Landssamtökin Þroskahjálp og Átak á Íslandi, NFU í Noregi, FDUV og Steg för steg í Álandseyjum og Finnlandi, Javni í Færeyjum.

Gerður A. Árnadóttir formaður Friðrik Sigurðsson framkvæmdastjóri fulltrúar Landssamtakanna Þroskahjálpar (Íslands) á ráðstefnunni.